2THESSALONIKA,1:1-12

      2Thessalonians (1/3)  →
1.  Paula leh Silvana leh Timothea chuan, Pathian kan Pa leh Lalpa Isua Kristaa Thessalonika khuaa mi kohhranhote hnenah:
2.  Pa, Pathian leh Lalpa Isua Krista hnen ata khawngaihna leh remna in hnenah awm rawh se.
3.  Unaute u, nangmahni chung thu-ah hian Pathian hnenah lawmthu hril fo tur reng kan ni; chu chu a awm reng a ni, in rinna chu nasa taka thang lianin, in zaa in inhmangaih tawn theuhna chu a pung lehzual si a;
4.  chutichuan mi tihduhdahna che u zawng zawngah leh hrehawm in tuarnaahte chuan in chhelzia leh in rinzia avangin Pathian kohhran pawlte zingah chuan keini'n kan chhuang thin che u a ni;
5.  chung chu Pathian rama mi ni tlaka ruat in ni thei dawn tih, Pathian rorel fel tak chhinchhiahna fiah tak a ni, chu mi ram avanga tuar in nih hi;
6.  Lalpa Isua Pathian hre lo mi leh kan Lalpa Isua Chanchin Tha awih lo mite chunga phuba lain
7.  a vantirhkoh chak takte nen, meialh zinga van atanga inlar hunah a tihrehawmtute che u chu hrehawmna thungrulh leh
8.  nangni hrehawm tuartute hi keimahni nena chawlhnaa rulh thung chu Pathian tan thil fel tak a ni si a.
9.  Chu mi ni-ah chuan a mi thianghlimahte chuan chawimawia awm tur leh,
10.  ringtu zawng zawngahte chuan (kan thu hriattir che u kha in ring si a) mak tih tura a lo kal hunah chuan chung Pathian hre lo mi leh kan Lalpa Isua Chanchin Tha awih lo mite chuan hrem an tuar ang, Lalpa hnen ata leh a chakna ropuina atanga chatuana boralna chu.
11.  Chutianga chawimawi leh mak tih a nih theihna'n kan Pathianin a kohna che u-ah chuan koh tlak nia a ruat theihna tur che u leh, that duhna tinreng leh rinna hnathawh tinrenga a thiltihtheihnaa a hlawhtlintir theihna turin kan tawngtaisak fo thin che u a nih hi;chutichuan kan Pathian leh Lalpa Isua Krista khawngaihna ang zelin kan Lalpa Isua hming chu nangmahniah chawimawiin a awm thei ang a, nangni pawh amahah chawimawiin in awm thei ang.
12.  chutichuan kan Pathian leh Lalpa Isua Krista khawngaihna ang zelin kan Lalpa Isua hming chu nangmahniah chawimawiin a awm thei ang a, nangni pawh amahah chawimawiin in awm thei ang.
      2Thessalonians (1/3)  →