EXODUS,23:1-33

←  Exodus (23/40)  →
1.  "Thuthang dik lo chu I sawi chhawng mai mai tur a ni lo e: hretu fel lo tak nihna turin mi suaksual zingah chuan I kut chu telh ve suh.
2.  Thil sual tih tumin mipui chu I zui tur a ni lo a; thubuaiah pawh a tam lam, a dik lo zawk lamah chuan I tang ve mai tur a ni hek lo:
3.  mi rethei pawh a thubuaiah I tan bik tur a ni hek lo.
4.  I hmelma sebawngpa emaw a sabengtung emaw bo I hmuh chuan, a hnenah I khalh hawnsak leh ngei tur a ni.
5.  Nangmah hawtu che sabengtung a phurin a delh beh reng I hmuhin, puih duhna reng nei lo mah la, I pui ngei tur a ni.
6.  I mi rethei chu a thubuaiah dik lo takin I relsak tur a ni lo.
7.  Thu dik loah zawng inthiarfihlim daih rawh; tin, mi thiam leh mi felte chu tihlum suh; mi suaksualte chu thiam ka chantir dawn si lo a.
8.  Tin, thamna reng reng I la tur a ni lo: thamna chuan khaw hmu lai mitte hi a tihdelsak thin a, mi fel thu chu a tihkhawlohsak thin.
9.  Hnam dang I hnehchhiah tur a ni lo: nangni pawh Aigupta ramah khan hnam dang in lo nih tawh avangin hnam dang rilru put dan chu in hre si a.
10.  Kum ruk chhung chu I loah buh tuh tur a ni a, chuta a hawng apiang chu khung zel tur a ni:
11.  a kum sarih kum erawh chuan awmtir la, dah tui rawh; tichuan I mi retheiten an ei ve thei ang a; tin, an lak bang awm apiang chu ram saten an ei ve dawn nia. Chuvtiang bawkin I grep huan leh I oliv huan pawh I ti ve bawk tur a ni.
12.  Ni ruk chhungin I hna I thawk tur a ni a, a ni sarih ni chuan I chawl rih tur a ni: tichuan I sebawngpa emaw I sabengtung emaw an lo chawl thei ang a, I bawihnu fapate leh I hnam dangte pawh an lo hahdam ve thei dawn nia.
13.  Tichuan in hnena ka sawi zawng zawng hi ngaihven u la: pathian dangte hming reng reng chu lam suh u, in ka atangin chhuah pawh chhuak suh se.
14.  Kum khatah vawi thum ka tan kut I nei tur a ni.
15.  Chhang dawidim telh loh kut I nei tur a ni. Thu ka lo pek tak che ang khan, ni sarih chhung chu chhang dawidim telh loh Abib thlaa hun ruatah khan I ei tur a ni, (kha mi thlain a nih kha Aigupta ram ata I lo chhuah:) tichuan ka hmaah tumah hi kut ruakin in lo kal tur a ni lo:
16.  tin, loa I tuh, I thawhrim rah hmasa ber, buhseng k_t chu I nei tur a ni: tin, kum ral veleh loah I thawhrim rahte I khung vek hnuin pawl kut I nei tur a ni.
17.  Kum khatah vawi thum I mipate zawng zawng chu LALPA Pathian hmaah an rawn inlan thin tur a ni.
18.  Ka tan inthawina sa thisen chu chhang dawidim telh nen chuan I rawn hlan tur ani lo; ka tan kutna sathau chu zankhuain atuk thlengin awmtir reng tur a ni hek lo.
19.  I loah thlai thar hmasa ber chu LALPA I Pathian inah I rawn dah tur a ni. Kel no sa a pui hnutetuiin I chhum tur a ni lo.
20.  Ngai the, kawnga veng zel tur che leh hmun ka buatsaihah chuan hruai lut tur chein I hmaah vantirhkoh ka rawn tir dawn e.
21.  Ama zai ngai zel u langin, a thusawi pawm thin ang che u; a chungah hel suh u: inbawhchhiatnate chu a ngaidam duh dawn si lo a; amahah chuan ka hming a awm a nia.
22.  Amaherawhchu a thusawi I pawmsak tak meuh a, ka sawi apiang I tih zel chuan I hmelmate hmelma chu ka ni ve, ang a, I dote dova chu ka ni ve ang.
23.  Ka vantirhkoh chuan I hma a hruai zel ang a, Amor-hote, Hit-hote, Periz-hote, Kanaan-hote, Hiv-hote, Jebus-hote awmnaah chuan a hruai ang che: anni chu ka tiboral daih dawn e.
24.  An pathiante chu chibai I buk tur a ni hek lo a, an rawng I bawl tur a ni hek lo, an thiltih angte chu I ti ve tur a ni hek lo, I tichimit vek tur a ni a, an lungphunte chu I tikeh sawm vek zawk tur a ni.
25.  Tin, LALPA in Pathian rawng chu in bawl tur a ni, tichuan I chhang leh I tui chu mal a sawm ang a; tin, in zing ata hri ka tikiang daih dawn nia.
26.  I ram chhungah hian nau chhiat leh ching reng an awm lo ang a: I dam chhung nite chu ka tihtlingtlaksak ang che.
27.  I hmaah chuan ka tihbaihna ka tir ang a, I kalna tur rama mite zawng zawng chu ka 0timangang ang a, tichuan I hmelmate zawng zawng chu I hmaah ka tlanchhiattir ang.
28.  Tin, I hmaah khawinghal ka tir ang a, chu chuan Hiv-hote, Kanaan-hote, Hit-ho te I hmaah chuan a um zel ang.
29.  Kum khata chhung mai chuan ka hnawhchhuahsak lo ang che; chutilozawng ram chu a lo tiau mai ang a, ram sate chu I tan a lo tam lutuk dah ang e.
30.  I lo puna ram chu I luah khah hma chuan zawi zawiin ka hnawhchhuahsak hret hret zawk ang che.
31.  I ramri chu Tuifinriat Sen atanga Philistia-ho tuipui thlengin, tin, thlaler atanga Lui thlengin ka khamsan ang che: chu mi rama awmte chu in kutah ka pe dawn si a; tihchuan anmahni chu I hnawtchhuak tur a ni.
32.  An hnenah thu I thlung tur a ni lo e, an pathiante hnenah pawh I thlung tur a ni hek lo.I ram chhungah an awm tur a ni lo, chutilozawng ka chungah hian an sualtir dah ang che: an pathiante rawng I bawl vaih zawngin I tan thang a ni ngei dawn a ni,' tiin," a ti a.
33.  I ram chhungah an awm tur a ni lo, chutilozawng ka chungah hian an sualtir dah ang che: an pathiante rawng I bawl vaih zawngin I tan thang a ni ngei dawn a ni,' tiin," a ti a.
←  Exodus (23/40)  →