SAM,119:1-176

← Psalms (119/150) → 1. Kawnga mi tha famkimte chu an eng a thawl e, LALPA dan zawhtute chu. 2. A thuhriattirte zawmtute chu an eng a thawl e, Thinlung zawng zawnga zawngtute chu. 3. A ni, anni chu fel lohna reng reng an ti lo a; A kawngahte chuan an kal thin. 4. Nangin i thununna thute chu thupekin min pe a, Thahnemngai taka kan zawm theihna turin. 5. Aw, i thuruatte chu zawm turin Ka awm dante hi tihnghehin awm teh se la aw! 6. Chu mi hunah chuan ka mualpho lo ang, I thupekte zawng zawng ka pawisak hunah chuan. 7. Thinlung dik tak puin lawm thu ka hrilh ang che, I rorelna felte chu ka zir hunah chuan. 8. I thuruat chu ka zawm ang e. Aw mi kalsan hlen suh ang che. 9. Tleirawlin engtin nge a awm dan a tihthianghlim ang? I thu ang zela a awm dan veng thain. 10. Ka thinlung zawng zawng hian ka zawng chia: Aw, i thupekte ka kal bosan chu phal lul suh ang che. 11. I chunga thil ka tihsual lohna'n I thu chu ka thinlungah ka khawl khawm a. 12. Aw LALPA, i eng a thawl e; I thuruatte chu mi zirtir ang che. 13. I kaa i rorel chhuak zawng zawngte chu Ka hmuiin ka hriattr ta. 14. I thuhriattir kawngah chuan ka hlim a, Hausakna zawng zawnga ka hlim ang maiin. 15. I thununna thute chu ka ngaihtuah ang a, I kawngte chu ka ngaihsak bawk ang. 16. I thuruat chungahte chuan ka lawm ang a: I thu chu ka theihnghlh lo ang. 17. Ka nun theihna turin i chhiahhlawh chungah hian tha takin ti ang che; Chutichuan i thu ka zawm ang. 18. I dan thu atanga thilmak ka hmuh theihna'n, Ka mitte hi mi tihvarsak ang che. 19. Leiah hian mikhual ka ni a: I thupekte chu ka lakah zep suh ang che. 20. Ka nunna hi keh sawmin a awm a, Englai pawha i rorelnate a ngaih avangin. 21. Mi chapo, anchhe dawngte chu, i zilhhau a, I thupekte vah bosan thinte chu. 22. Sawi chhiatna leh hmusitna hi ka hnen ata la bo ang che; I thuhriattirte chu ka zawm si a. 23. Mi liante pah an thu a, mi sawisel a: Nimahsela i chhiahhlawh hian i thu ruatte chu a ngaihtuah zawk si a. 24. I thuhriattirte chu ka lawmna a ni a, Rem mi ruatsaktute pawh a ni. 25. Ka nunna hi vaivutah a bet tlat a: I thu ang zelin mi tiharh ang che. 26. Ka awm dante chu ka hriattir chian, nangin mi chhang a: I thuruatte chu mi zirtir ang che. 27. I thununna kawng chu mi hriat thiamtir ang che: Chutichuan i thilmak tih thute chu ka ngaihtuah ang. 28. Ka nunna hi lungngaih avangin ka tuiral thin. I thu ang zelin mi tichak ang che. 29. Awm dan dik lo hi ka hnen ata la sawn la: I dan khawngaih takin mi pe ang che. 30. Awm dan rinawm ka thlang a: I rorelnate ka hmaah ka awmtir a. 31. I thuhriattirahte hian ka bet tlat a: Aw LALPA, mi timualpho suh ang che. 32. I thupek kawngah chuan ka tlan ang. Ka thinlung hi i tihzau hunah chuan. 33. Aw LALPA, i thuruat kawng chu mi entir ang che; Tichuan a tawp thlengin ka zawh dawn nia. 34. Hriat thiamna mi pe ang hche, tichuan i dan chu ka vawng tha dawn nia; A ni, ka thinlung zawng zawng hian ka zawm ang. 35. I thupek kawngah mi kaltir ang che; Chu mi-ah chuan ka lawm si a. 36. I thuhriattir lamah chuan ka thinlung hi thlektir ang che, Duhamna lamah ni loin. 37. Thil engmah lo mai mai en lo turin ka mit mi laktir la, I kawngahte chuan mi tiharh ang che. 38. I thu chu i chhiahhlawh hnenah hian tinghet ang che, Chu chu nangmah tihtu tan a ni. 39. Mi sawichhiatna ka hlauh hi la bo ang che, I rorelte chu a tha si a. 40. Ngai teh, i thununa thute chu hriat ka chak thin a: I felna avangin mi tiharh ang che. 41. Aw LALPA, i ngilneihnate chu ka hnenah lo kal rawh se, I chhandamna ngei chu, i thu ang zelin. 42. Chutichuan, mi sawi chhetu chhanna tur ka nei ang; I thu ka ring si a. 43. Tin, thutak thu chu ka ka ata hi la chhuak vek suh ang che; I rorelnate chu ka beisei si thin a. 44. Chutichuan i dan chu ka zawm fo ang, Kumkhaw tlaitluanin. 45. Tin, dip dal loin ka leng ang; I thununna thute chu ka zawng si a. 46. I thuhriattir thute chu lalho hmaah ka sawi ang a, Ka zak lo ang. 47. Tin, i thupek, ka ngaihnat chungahte chuan, Ka lawm ang. 48. I thupek, ka ngaihnat lamahte chuan ka kutte ka phar ang a; I thuruatte chu ka ngaihtuah ang. 49. I chhiahhlawh hnena thutiam chu hre reng ang che, Nangin mi beiseitir avangin. 50. Chu chu ka hrehawmnaah pawh ka thlamuanna a ni: I thu chuan mi tiharh ta si a. 51. Chapote chuan nasa takin mi nuihzabur a: Nimahsela i dan chu ka kalkawisan lo. 52. Aw LALPA, hmasanga i rorelte chu ka hre reng a, Ka inthlamuan thin. 53. Lungnih lohna nasa tak hian mi tlakbuak ta a, Mi suaksual i dan kalsantute avangin. 54. Ka khualzinna inah hian I thuruatte chu ka hla a ni thin. 55. Aw LALPA, zanah chuan i hming ka hre reng thin a, I dan pawh ka zawm thin. 56. Chung chu ka nei a, I thununa thute chu ka vawn that avangin. 57. LALPA chu ka chanvo a ni: I thu ka zamw ang tih ka sawi tawh kha. 58. Ka thinlung zawng zawngin i khawngaihna ka ngen a: I thu ang zelin mi khawngaih ang che. 59. Ka awm dante ka ngaihtuah a, I thuhriattir lamah chuan ka ke ka pen ta a. 60. I thupekte zawm turin Ka hmanhmawh a, rei ka rial lo. 61. Mi suaksualho hruaihrualte chuan mi zem hlawm reng a; Nimahsela i dan chu ka theihnghilh lo. 62. Zan laiah lawm thu hrilh tur chein ka hto ang, I rorel felte avangin. 63. Nangmah tihtu zawng zawng leh, I thununna thute zawmtute thian ka ni. 64. Aw LALPA, leilung hi i ngilneihnain a khat a ni: I thuruatte chu mi zirtir ang che. 65. Aw LALPA, i thu ang zelin I chhiahhlawh hi i titha thin. 66. Ngaihtuah thiamna leh hriatna mi zirtir ang che; I thupekte chu ka ring si a. 67. Tihhreawma ka awm hma khan ka vak bo thin a; Tunah erawh chuan i thu ka zawm ta. 68. Nang chu i tha a, thil tha i ti bawk a; I thuruatte chu mi zirtir ang che. 69. Chapote chuan ka chungah dawt an phuahchawp a: Ka thinlung zawng zawng hian i thununna thute chu ka vawng tha ang. 70. An thinlung chu rilbawh thau angin a thau a; Kei erawh chu i dan chungah ka lawm thin. 71. I thuruatte chu ka zir theihna'na Tihhreawma ka lo awm kha ka tan a tha a ni. 72. Rangkachak leh tangka sang tam tak ai chuan I kaa dan chhuak chu ka tan a tha zawk e. 73. I kutin mi siamin, mi din a ni: I thupekte chu ka zir theihna'n hriatthiamna mi pe ang che. 74. Nangmah tihtute chuan mi hmu ang a, an lawm ang; I thu chu ka beisei thin avangin. 75. Aw LALPA, i rorelte chu a fel tih leh, Nang chuan rinawm takin a ni, mi tihhreawm ni tih ka hria. 76. I chhiahhlawh hnena i thutiam ang zelin Khawngaih takin i ngilneihna chu ka thlamuanna tur ni rawh se. 77. Ka nun theihna turin i lainatnate ka hnenah lo kal rawh se: I dan chu ka lawmna a ni si a. 78. Chapote chu mualphoin awm rawh se; dik lo takin mi titlawm ta si a: Nimahsela i thununna thute chu ka ngaihtuah ang. 79. Nangmah tihtute chu ka lamah hawi rawh se, Tichuan i thuhriattirte chu an hre dawn nia. 80. Ka mualpho lohna turin Ka thinlung hi i thuruatahte chuan tha famkimin awm rawh se. 81. Ka nunna hi i chhandamna ngaiin a chau ta a: Nimahsela i thu ka beisei thin. 82. I thu thlirna'n ka mit a vai zo ta a, "Nangin engtikah nge mi thlamuan ang?" ka ti, ka ti thin a. 83. Meikhu ur savun peng ang chu ka lo ni ta si a; Nimahsela i thuruatte chu ka theihnghilh lo e. 84. I chhiahhlawh kum chin tur hi engzat nge ni dawn? Mi tiduhdahtute chungah hian engtikah nge ro i rel dawn? 85. Mi chapo, i dan anga awm lote chuan, Ka tlakna'n khuarkhurumte an lai a 86. I thupek zawng zawng hu a rinawm a ni: Anni chuan dik lo takah mi tihduhdah thin hi; mi tanpui ang che. 87. Anni chuan leiah hian mi tiboral thelh thelh a; Nimahsela i thununna thute chu ka hawisan si lo a. 88. I ngilneihna ang zelin mi tiharh ang che; Chutichuan i kaa thuhriattir chu ka zawm dawn nia. 89. Aw LALPA, kumkhua atan I thu chu vanah nghet takin a awm a. 90. I rinawmna chu chhuan zawng zawng thlengin a awm ang: Leilung hi i tinghet a, a awm reng a ni. 91. Chungte chu vawiin hian i rorelte angin an awm reng a; Thil zawng zawng chu i chhiahhlawhte an ni si a. 92. I dan chu ka lawmna ni suh se la chuan, ka hrehawmnaah khan ka boral tawh tur a ni. 93. I thununna thue chu engtikah mah ka theihnghilh lo ang; Nangin chung chun mi tiharh ta si a. 94. I ta ka nih hi, mi chhandam ang che; I thununna thute chu ka zawng si a. 95. Mi suaksualte chuan mi tihboral tumin mi nghak thin a; Nimahsela i thuhriattirte chu ka ngaihtuah ang. 96. That famkimna zawng zawng tawp chu ka hmu ta a, I thupek erawh chu a zau khawp mai a ni. 97. Aw, i dan hi ka va ngaina em! Nilenga ka ngaihtuah thin a ni. 98. I thupekte chuan mi dotute aia fing zawkin mi siam a; Kumkhuaa ka hnena a awm fo thin aangin. 99. Min zirtirtu zawng zawng aiin finna ka nei zawk a ni; I thuhriattirte hi ka ngaihtuah a nih thin avangin. 100. Tarte ai chuan ka hre thiam zawk a ni, I thununna thute hi ka vawn that avangin. 101. I thu ka zawm theihna turin Kawng sualah reng reng chuan ka kete hi pen ka phal lo. 102. I rorelna lakahte chuan ka peng lo; Nangin mi zirtir avangin. 103. I thute hi ka tan a va thlum em! A ni, ka ka atan a va thlum em! A ni, ka ka atan chuan khawizu aiin a thlum zawk. 104. I thununna thute avangin hriat thiamna ka nei thin: Chuvangin awm dan dik lo tinreng hi ka hua a ni. 105. I thu hi ka ke atante hian khawnvar a ni a, Ka kawng atan eng a ni. 106. I rorelna fel takte chu zamw turin Chhia ka chham a, ka tinghet bawk a. 107. Nasa taka tihhreawmin ka awm a: Aw LALPA, i thu ang zelin mi tiharh ang che. 108. Aw LALPA, khawngaih takin ka kaa duh thua thilpekte hi la la, I rorelnate chu mi zirtir ang che. 109. Ka nunna hi ka kutah a awm fo thin a; Nimahsela, i dan chu ka theihnghilh ngai lo. 110. Mi suaksualte chuan ka awhna'n thang an kam a; Nimahsela i thununa thute chu ka vah bosan lo e. 111. I thuhriattirte chu kumkhuaa rochunah ka la a; Ka thinlung tihlimtu a ni si a. 112. Kumkhuain, a tawp thlengin, I thuruatte anga ti turin ka thinlung ka thlektir a. 113. Rilru mumal nei lo mite chu ka hua a; I dan erawh chu ka ngaina a ni. 114. Nang chu ka bihrukna hmun leh ka phaw i ni a: I thu ka beisei a ni. 115. Nangni thil tha lo titute u, mi kalsan rawh u; Ka Pathian thilpekte ka vawn that theihna'n. 116. Ka nun theihna turin i thu ang zelin mi chelh reng la, Ka beisei chungah hian zakin mi awmtir suh ang che. 117. Mi kai ang che, tichuan ka him ang a, I thuruatte chu ka pawisa fo dawn nia. 118. I thuruatte vah bosantu zawng zawng chu i hmusit a; An bumna hchu dawt a ni si a. 119. Leia mi suaksualte zawng zawng chu englo ekchhia angin i tibo thin a: Chuvangin i thuhriattirte chu ka ngaina a ni. 120. Ka tisa hi nangmah tihin a khur a; I rorelnate chu ka hlau bawk a. 121. Ro ka rel a, fel takin ka ti thin a ni: Mi hnehchhiahtute lakah mi thlahthlam suh ang che. 122. I chhiahhlawh chungchang thu-ah, a thatna turin a bul tum la: Chapoten mi hnehchhiah suh se. 123. I chhandamna thlirna'n ka mit a vai zo ta a, I thu fel tak thlirna'n nen. 124. I ngilneihna avangin i chhiahhlawh chungah hian ti la, I thuruatte chu mi zirtir ang che. 125. I chhiahhlawh ka ni a, hriat thiamna mi pe ang che; I thuhriattirte chu ka hriat theihna'n. 126. LALPA, thawh a hun ta; I dan hi engmah loah an siam ta si. 127. Chuvangin i thupekte chu rangkachak aiin ka ngaina a ni, A ni , rangkachak thianghlim ai pawhin. 128. Chuvangin kawng tinreng thua i thununna thu zawng zawngte chu dikin ka hria a; Awm dan dik lo tinreng hi ka hua a ni. 129. I thuhriattirte chu a mak a ni: Chuvangin ka nunna hian a vawng tha thin. 130. I thu hrilhfiah hian mite a tieng a; Mi mawlte chu a hriat thiamtir thin. 131. Ka ka ka ang zau a, ka thaw hlawp hlawp a; I thupekte chu ka chak avangin. 132. Ka lam lo hawi la, mi khawngaih ang che, I hming ngainatutte i khawngaih ang khan. 133. Ka ke pente hi i thu-ah tinghet la; Sualna reng reng ka chungah thu neihtir suh ang che. 134. Mihring hnehchhiahna lakah chuan mi chhanhim ang che: Chutichuan i thununna thute chu ka zawm dawn nia. 135. I hmelin i chhiahhlawh chhun eng la; I thuruatte chu mi zirtir ang che. 136. Ka mittui hi lui tui angin a luang thla a, I dan an zawm loh avangin. 137. Aw LALPA, nang chu i fel a, I rorelte pawh a dik a ni. 138. I thuhriattirte chu fel tak leh Rinawm em emin thu i pe a. 139. Ka thehnemngaihna hian mi tiboral ta, Mi dotuten i thu an theihnghilh tak avangin. 140. I thu hi a thianghlim em em a ni; Chuvangin i chhiahhlawh hian a ngaina a ni. 141. Mi te leh mi hmusit ka ni a: Nimahsela i thununna thute chu ka theihnghilh ngai lo e. 142. I felna chu kumkhaw felna tur ani a, I dan pawh thutak a ni. 143. Manganna leh thlaphanna chuan mi tlakbuak ta a: Nimahsela i thupekte hi ka lawmna a ni. 144. I thuhriattirte chu kumkhua atan a fel a ni: Hriat thiamna mi pe ang che, tichuan ka nung reng ang. 145. Ka thinlung zawng zawngin ka ko chia; aw LALPA, mi chhang ang che: I thuruatte chu ka vawng tha dawn nia. 146. Ka ko thin chia; mi chhandam ang che. Tichuan i thuhriattirte chu ka zawm dawn nia. 147. Khawfing chat chu ka khalh a, ka au thin a: I thute chu ka beisei thin. 148. I thu ka ngaihtuah theihna turin Ka mitin zan vente chu ka men khalh thin. 149. I ngilneihna ang zelin ka aw hi ngaithla la: Aw LALPA, i rorelnate ang zelin mi tiharh ang che. 150. Ngaihtuahna sual umho chuan an an rawh hnaih a; Anni chu i dan hlata awm an ni. 151. Aw LALPA, nang chu i hnai a; I thupek zawng zawng chu thutak a ni. 152. Hmasangin, i thuhriattirte atangin, Chung chu kumkhua atan i tinghet tih ka lo hre tawh. 153. Ka hrehawmzia hi ngaihtuah la, mi chhanhim ang che; I dan chu ka theihnghilh ngai si lo a. 154. Ka thu mi sawipuiin, mi tlann la; I thu ang zelin mi tiharh ang che. 155. Chhandamna chu mi suaksualte laka hla a ni; I thuruatte chu an zanw loh avangin. 156. Aw LALPA, i lainatnate chu a nasa a ni: I rorelnate ang zelin mi tiharh ang che. 157. Mi tiduhdahtute leh mi dotute chu tam tak an ni. Nimahsela i thuhriattirte chu ka kal kawisan lo. 158. Vervek taka titute chu ka en a, ka lungni lo a; I thu an zawm loh avangin. 159. I thununna thute ka ngainatzia hi ngaihtuah la; Aw LALPA, i ngilneihna avangin mi tiharh ang che. 160. I thu infinkhawm chu thutak a ni a; I thu infinkhawm chu thutak a ni a, I rorelna fel tinreng pawh hi kum khuain a awm reng ang. 161. Mi lianten enga khawlawi loin mi tiduhdah a; Nimahsela ka thinlung chuan i thute a ni, a hlauh ni. 162. I thu-ah hian ka hlim a ni. Thil ropui tak rallaka hmutu angin. 163. Dawt hi ka huain ka ten a; I dan erawh chu ka ngaina a ni. 164. Ni khatah vawi sarih ka fak thin che a ni. I rorel felte avangin. 165. I dan ngainatute chuan thlamuanna nasa tak an nei a, Tlukna reng reng an nei lo. 166. Aw LALPA, i chhandamna ke beisei reng a, I thupekte angin ka ti thin. 167. Ka nunna hian i thuhriattirte chu a zawm thin a; Ka ngaina em em a ni. 168. I thununna thute leh i thuhriatirte chu ka zamw thin a; Ka awm dan zawng zawng hi i hmaa awm ani si a. 169. Aw LALPA, ka au thawm hi i hmaah lo hnai rawh se: I thu ang zelin hriat thiamna mi pe ang che. 170. Khawngaih ka dilna hi i hmaah thleng rawh se: I thu ang zelin mi chhanhim ang che. 171. Ka hmui hian fakna thu sawi rawh se; Nangin i thuruatte chu mi zirtir thin avangin. 172. Ka lei hi i thu fakin zai rawh se; I thupek zawng zawng chu felna a ni avangin. 173. I kut chu mi tanpui turin inpeihsain awm rawh se: I thununa thute chu ka thlang si a. 174. Aw LALPA, i chhandamna chu ka chak thin a; I dan chu ka lawmna a ni. 175. Ka nuna hi nung rawh se, tichuan a fak dawn che nia. I rorelnate pawhin mi tanpui rawh se.Beram bo angin ka vak bo a; i chhiahhlawh hi zawng ang che; I thupekte chu ka theihnghilh ngai si lo a. 176. Beram bo angin ka vak bo a; i chhiahhlawh hi zawng ang che; I thupekte chu ka theihnghilh ngai si lo a. ← Psalms (119/150) →